John Caller S. Durand se nouvo Direktè Maketing Ste Rose Gros Bœuf International

Rara Ste Rose Gros Bœuf International anonse siyati John Caller S. Durand kòm nouvo Direktè Maketing ak Jesyon Rezo Sosyal pou pwochen de (2) ane k ap vini la yo. Ak eksperyans li nan maketing dijital, ansyen DGMD bann Brillant Soleil de Laferonnay an vize fè rara sa a devlope ak touche yon pi gwo odyans, pa sèlman nan Leyogàn, men atravè tout peyi an ak nan dyaspora a.

John Caller S. Durand, yon pwofesyonèl ki gen anpil eksperyans nan maketing dijital, te eksprime satisfaksyon li sou nouvo kontra sa a. Pandan yon entèvyou ak HPost5, li fè konnen nouvo defi sa a pèmèt li mete rara Leyogàn nan yon lòt nivo. « Motivasyon an se anvi pou n toujou ale pi lwen, nou te bezwen nouvo defi pou n kapab montre tout moun objektif nou ki se mete rara nan yon lòt dimansyon. » deklarasyon John.

Dapre John Caller S. Durand, premye etap nan plan maketing li a se amelyore prezans mizik bann lan sou rezo sosyal yo. Apre sa, li pral planifye pou monetize tout aktivite bann lan sou medya dijital yo. Sa k ap kreye opòtinite pou pwodwi ak sèvis rara Ste Rose Gros Bœuf ka rantabilize. « Nou gen anpil plan ki byen defini, etap pa etap n ap mete yo deyò, nou gentan komanse avek mizik bann nan, » toujou dapre deklarasyon l, pandan l te ajoute li pral montre gen lòt chemen ankò ki poko eksplwate pou fè rara a evolye sou rezo sosyal yo.

Yon lòt pwen enpòtan nan vizyon John se chanjman imaj rara Leyogàn nan nivo nasyonal ak entènasyonal. Li kwè atravè travay li ap gen pou fè nan Ste Rose la, rara a ap vin gen plis viziblite. Jhon swete lòt bann rara yo swiv wout sa a tou pou ede rara Leyogàn touche yon odyans pi laj e menm entanasyonal. « Kontribisyon m ap pote a se a travè travay m pral fè nan Ste Rose la y ap wè l. E m swete anpil bann swiv wout la paske se bon direksyon an, » deklarasyon John nan mikwo nou. 

Menm si vizyon John se pote rara Leyogàn nan yon nivo byen wo, li konsyan pral genyen anpil defi. Pi gwo defi a, dapre li, se konvenk fanatik rara yo antre nan lojik e-commerce la. Men li rete optimis ak bon jan estrateji ak patenarya, bann lan kapab atenn objektif sa yo pandan pwochen de (2) ane k ap vini yo. « Pi gwo defi a se ap konvenk fanatik rara yo antre nan lojik E-Commerce la, men nou ap travay pou n atenn objektif yo. »

Nan pale sou eksperyans li nan bann Briyant lan, John rekonèt bèl eksperyans li te genyen ak bann Laferonnay an, pandan l remèsye dirijan yo pou konfyans yo te mete nan li. Men li ajoute li santi nouvo defi yo nan Ste Rose se sa k te toujou atire l. « M pa kite BSL, m se toujou fanatik ak zanmi pwòch bann nan, » dapre sa l di, pandan l te fè konnen, vini nan bann Ste Rose la, se youn nan pi gwo tchalennj ki motive li pou l fè rara a ale pi lwen.

Antanke nouvo Direktè Maketing ak Jesyon Rezo Sosyal pou Ste Rose Gros Bœuf International, John Caller S. Durand gen yon misyon klè: mete rara Leyogàn nan yon lòt nivo, epi fè bann li reprezante a gen plis viziblite, plis evolisyon, ak plis kominikasyon sou plan nasyonal ak entènasyonal. Fanatik rara yo kounye a gen anpil pou atann pandan bann Ste Rose Gros Bœuf ap prepare pou yon nouvo epòk.