Espas Lajwa: yon espas pou timoun yo aprann e epanouyi yo nan kè kontan.

Lè yon timoun ap grandi, li enpòtan pou n mete l nan yon anviwònman ki favorize devlopman global li : kote li ka amize l pandan l ap aprann, kote li ka benyen nan kilti pandan l ap devlope bon rapò ak tèt li, ak rasin peyi a. Nou kwè fòk nou fòme timoun jodi a pou yo ka tounen granmoun ki responsab demen. Se nan sans sa a Kay Jèn Yo lanse «Espas Lajwa», yon espas kote timoun yo ap aprann e epanouyi yo nan kè kontan.

Nan komin kafou, 18 enpas Thoby, Mahotière 79, se la n ap jwenn yon espas kote n ap ka «Reve ansanm». Non an se «Kay jèn yo». Kote sila kreye yon anviwònman ak pwopoze kontni pou jèn ak timoun reyini , koute , pale patisipe nan plizyè aktivite literè, edikatif ak atistik. Aktivite sa yo se grenn k ap simen pou demen nou ka gen bèl pyebwa ki pote bon fwi pou peyi a. Wi, nou dwe simen jodiya.

« Espas Lajwa » se yon pwojè ki enskri nan kad pwogram « Timoun se moun » ACTIF lanse depi plis pase de lane. « Espas Lajwa » se yon semèn aktivite soti 18 pou rive 24 dawou 2025. Ant 9è pou 1è nan aprè midi, aktivite sila a fèt pou timoun ak adolesan soti nan laj 7 an pou rive a 15 lane. Yon kotizasyon 150 goud, se mwayen sa k ap pèmèt timoun yo pase jounen yo nan divès aktivite tankou : Atelye Penti, sinema, Makrame, Aprantisaj lang siy yo, kwochè, Teyat, jwèt tradisyonèl ak videyo, Pwezi elt… Wi Pwezi. Lide a se ofri timoun ak adolesan yo moso solèy. Ofri yo ti gout myèl k ap sòti nan tete lavi an malgre jan sitiyasyon yo ka ye.

Kay Jèn Yo, jwenn lòt estrikti ki kole zepòl ak li pou reyalize « Espas Lajwa ». Nou ka site «La Perfection École de Haute Couture», Kafounews, HPost5, Laye Création, Oriol Photographie ak Popouri.

Pòt la louvri pou tout moun ki ta vle pote kole. Nan menm lojik men kontre a, n ap ka fè yon tranzaksyon pou piti 250 goud. Nimewo transfè yo 49374122 si se sou Moncash, 42519853 si se Natcash.

Nou pa ka fini san n pa di «Kay Jèn yo» se yon inisyativ « Action Communautaire de Transformation et d’Intégration Formelle » (ACTIF) ki vize reponn ak defi ak prekarite timoun kou jèn ap fè fas ann Ayiti, sitou nan komin Kafou, nan yon sitiyasyon kriz sosyoekonomik ak sekiritè.

Pwogram sa ap chache redui vyolans ki genyen nan komonite an, timoun ak jèn ki viktim vyolans, devlope konpetans sosyokiltirèl ak pwofesyonèl jèn yo, ogmante ensèsyon jèn yo nan espas pwofesyonèl yo, favorize kreyasyon opòtinite ekonomik ki la pou lontan. Pandan y ap atake sik vyolans solidè a, Kay Jèn yo aspire transfòme trajektwa vyolan lavi timoun ak Jèn Ayisyen yo, e poze baz pou yon kominote san vyolans, ki pou tout moun ak ekitab.

Pou plis enfòmasyon, nou kw kontakte nimewo sa yo : 48350206 / 47260738.

Mardochée Gay